KINDERS EN TEGNOLOGIE

Kinders en Tegnologie

Tuisskolers het gemengde gevoelens oor tegnologie en die rol wat dit behoort te speel in ons kinders se ontwikkeling. Daar is die wat glo dat tegnologie liefs vermy moet word, veral onder jong kinders, en dan is daar die wat glo dat kinders hulself moet reguleer wanneer dit by tegnologie kom.

Ek is ‘n lid van “Unschooling Special Needs” op Facebook, en ek was werklik waar gister ontnugter gedurende ‘n omstrede debat wat gehandel het oor vrye toegang tot rekenaars, ipads, internet, en selfone. Daar is soveel ouers wat glo dat, soos met enige ander gedeelte van “unschooling”, die kind vrye toegang behoort te geniet. Hulle argument word basseer op die uitkyk dat die kind die vermoё het om homself te reguleer, dat die nuutjie vanself sal verby gaan, en dat die kind uiteindelik self sal aanleer hoe om ‘n goeie balans te handhaaf.

Ek is ‘n oopkop mens, en was nog nooit bekend daarvoor dat ek tradisies slaafs navolg nie, maar in hierdie geval leun ek meer na die tradisionele uitkyk. Soos met enige ander onderwerp, hou ek daarvan om dit deeglik te ondersoek, en die feite teen mekaar op te weeg, alvorens ek ‘n standpunt inneem. Ek deel graag my uitkyk met julle:

SKERM TEGNOLOGIE HET ‘N VERSLAWENDE ELEMENT

Gedurende Mikhail se diagnose met Asperger, het bykans elke spesialis my gewaarsku teen fiksasie. Outistiese kinders is geneig om op ‘n onderwerp te fikseer, en hulself totaal in daardie onderwerp te omvou. Pro-aktief, en altyd optimisties, het ek besluit om dit in ons guns te laat werk. Wanneer Mikhail ‘n nuwe fiksasie beleef, duik ek eenvoudig saam met hom in die onderwerp in, ondersoek dit in diepte, en maak seker dat hy vergenoegd uit dit uitstap. Dit was werklik voordelig om hom behulpsaam te wees, eerder as om hom te veg daarop. Ek het gou agtergekom dat my kind aanbeweeg sodra hy voel hy het al die nodige inligting bekom. Maar wat van ‘n fiksasie wat om tegnologie wentel?

Ek het my teorie in hierdie verband op die toets gestel, maar gevind dat die verslawende element van tegnologie selfs volwassenes onder kry. Dis ‘n baie gemaklike wêreld – die kuberruimte, en voor jy dit weet, leef jy in ‘n tussen-in wêreld, wat jou weerhou van al God se gawes. Vir hierdie rede bevind myself aan hierdie kant van die draad, waar ek selfs nie ‘n televisie in die huis het nie, en het ek geen behoefte om oor te spring na die meer liberale uitkyk nie.

TELEVISIE

Televisie is taboe, want dit beroof my gesin van God se wonderlike geskenk van leef, en ek sal veel eerder self kies waaraan my kind blootgestel word. Ons is hierdie jaar drie jaar vry van televisie se invloed, en ons het geleer om op gesonde plekke inligting te verkry. Maroela Media hou my op hoogte van die nuus, en vir kinderprogramme, het ek die wonderlike voordeel dat ek eers kan seker maak dat dit voordelig is vir my kind, voordat ek hom daaraan blootstel.

Dis nie om my kind selektief groot te maak en te beskerm teen die werklikheid nie, maar eerder om hom op die regte tyd, en in die regte dosisse bloot te stel, sodat ek seker is hy het die kapasiteit om te onderskei tussen die goeie en die slegte.

REKENAARS, IPADS, EN INTERNET

My hoofberoep is die van publieke verhoudinge, en ek is ook ‘n grafiese ontwerper. Dylan, my oudste, is ‘n programmeerder, en ons huis het van die beste tegnologie. Ons het drie skootrekenaars, ‘n ipad, en ons ADSL lyn is van die beste.

Ons gebruik hierdie hulpbronne op ‘n daaglikse basis, maar my Khailie-kind (9) het nie die opsie om van vroeg tot laat daarvan gebruik te maak nie.

Ons gebruik dit saam deur die loop van die dag vir opvoedkundige doeleindes, en indien hy ekstra tyd wil verkry om ‘n aanlyn speletjie of iets te speel, moet hy punte verwerf wat in tyd omgeskakel kan word. Hy is nie soos baie van sy maats op sosiale netwerke nie, en sy internet gaan slegs na die skakel toe waarop ons ooreengestem het.

Skerm tegnologie neem jou weg van realiteit af. Dit plant saadjies in jou kop wat ontevredenheid laat ontkiem. Dit steel jou tyd van werklik leef, en dit kan deure open waarteen God jou gewaarsku het. As ouer, is dit my verantwoordelikheid om my kind te lei tot ‘n gebalanseerde lewe, en om bo enige iets anders – hom te leer oor die liefde van God.

Hoor hoe fluit die voёltjies daar buite in die tuin. Luister na die reёn. Beleef die gevoel van gras onder jou voete. Spit ‘n bedding om en ruik aan die grond – dis wat God vir ons beplan het. Vra jouself die vraag af: Wat se invloed het ‘n dag se rekenaar op my kind, en wat se invloed het ‘n dag in die natuur op kind?

xoxo

 

 

 

 

 

 

Advertisements

3 thoughts on “KINDERS EN TEGNOLOGIE

  1. Ek stem so met jou saam. Tegnologie kan ‘n wonderlike hulpmiddel wees, maar as mens nie fyn trap nie, dan steel dit meer van jou as wat dit jou gee.

    Ek vermoed party mense is ook meer vatbaar vir skerm verslawing as ander. Tog het ek met my spruite gevind dat skerm tyd wat vir baie as aanvaarbaar min is, steeds hul kreatiwiteit steel en slaap negatief beïnvloed. Ons gebruik dit steeds, maar in so ‘n klein maat as moontlik.

    Like

  2. Reblogged this on Lomi and commented:
    Tegnologie het so ‘n groot deel van ons lewe geword dat dit goed is om stil te staan en te dink hoe ons dit benut en gebruik. En seker maak dit steel nie ander dinge van ons nie.

    Like

Lewer kommentaar

Verskaf jou besonderhede hieronder of klik op 'n logo om in te teken:

WordPress.com Logo

Jy lewer kommentaar met jou rekening by WordPress.com. Log Out / Verander )

Twitter picture

Jy lewer kommentaar met jou rekening by Twitter. Log Out / Verander )

Facebook photo

Jy lewer kommentaar met jou rekening by Facebook. Log Out / Verander )

Google+ photo

Jy lewer kommentaar met jou rekening by Google+. Log Out / Verander )

Connecting to %s